Podcast do nosso concerto ao vivo no Planeta Furancho (15/05/2014)

Entrevista a Liviao de Marrao para El Progreso con motivo da nosa actuación nas festas de Chantada

Liviao de Marrao no concerto da Candeloria 2014. Fotos de Miguel Grandío @mixigodo

1.- Como nace Liviao de Marrao?

LM: Foi un proceso que se deu cuns referentes culturais e ideolóxicos de fondo. A xeración Xabarín, á que lle prometeron estar na lavadora do crédito e o consumismo rematou centrifugada pola precariedade, a débeda e o desemprego. No noso caso, ser da aldea e acreditar en Galiza como nación completou o paquete, desde a retranca e sen medo a dicir as cousas como son, sen por iso deixar de facer festa e pasalo ben.

2.- Imaxino vos farán moito esta pregunta... porque ese nome?

Sospeitamos que de chamarnos Swinerock ou Bastardpigs non o preguntarían tanto. Tamén preguntan porque empregamos o galego ou porque somos “políticos”... Non deixa de ser máis un exemplo de que algo pasa neste país... de que falta moito para que a expresión cultural galega estea normalizada. Do outro... xa se sabe que Franco dicía no se meta en política. Os ladróns que nos fan pagar a nós a crise para encherlle os petos aos banqueiros sempre quixeron que esteamos calando e vendo fútbol. Traballar a destallo sen pensar.

No fondo, o nome responde a un desexo de provocación... ten sonoridade e nada máis específico da aldea que a matanza e o marrao... Ningún vello che pregunta que significa o nome, só lles sorprende que alguén poda falar das cousas da aldea, esas que como non cotizan en bolsa despreza esta sociedade de horizontes mentais tan “austeros”.

3.- En que vos inspirades á hora de crear novos temas?

En nós e as nosas circunstancias. Somos fillos dun tempo histórico, dun espazo xeográfico e dunha clase social. Iso dá unha perspectiva do mundo que loita contra a uniformidade do Imperialismo de Mc Donall's. O resto é recorrer a elementos repertoriais das linguaxes musical e literaria: o rock, o ska, o punk, a música tradicional galega... e, sobre todo, o espírito bravú que actualizou aquela sentencia de Vicente Risco que dícia «ti dis que Galiza é ben pequena, eu dígoche que Galiza é un mundo» por esta outra «temos forza de abondo para tronzar o universo enteiro». Ao final, non deixa de ser o desexo de estar no mundo desde o noso recuncho galaico, de voltar a aquel punto do programa do Partido Galeguista que expresaba o seu internacionalismo: «Galiza, célula de universalidade».

4.- Este ano publicastes o voso primeiro disco, Matança eta filhoak, como está sendo a acollida?

As críticas que nos chegaron de momento foron bastante boas, aínda que a xente raramente che fai chegar o negativo. Por sorte, somos bastante autocríticos co noso traballo e vemos aspectos a mellorar en cada cousa que facemos, o que non tira que as cousas se vexan diferentes desde fóra. Autoeditamos 1.000 copias para vender e para distribuír en centros sociais, festivais, locais de hostalaría... Tamén conseguimos chegar a Alemaña, Italia, Euskal Herria, Aragón, Països Catalans... e a ver se conseguimos que o noso traballo penetre na Lusofonía.

Loxicamente, o noso público obxectivo é bastante reducido en Galiza, infelizmente, e iso cando felizmente hai numerosas bandas de altísima calidade que fan cousas parecidas a nós. Na música galega, a que se fai en galego, un dos grupos que máis vende hoxe é Ruxe-Ruxe e as tiraxes dos seus discos non pasan dos 2.000 dos que, con sorte, quizais venda a metade. Calquera grupo que cante en basco ou catalán ten unha oferta de selos discográficos e unhas canles de promoción e venda moito maiores.

5.- Como vedes o panorama da música galega?

Non vemos moito a Panorama ou Olympus... No tocante ao rock galego, a música bravú e abertxale como nos lle chamamos ironicamente, leva vivindo sempre na precariedade e os festivais mantéñense con esforzos titánicos e cunhas institucións que ofrecen máis atrancos que solucións, como mostra o último proxecto de lei sobre espectáculo de Fernando VII, presidente da Xunta.

Liviao de Marrao componse de 11 persoas e hai duos que cobram tanto ou máis ca nós... No entanto, isto non pode ser unha escusa por tras da que parapetarse. É necesario asociarse entre as bandas e procurar fórmulas para alongar o público da nosa oferta musical, o noso sustento e razón de ser en definitiva. Tamén hai que levar fóra o que facemos, porque aquí segue pensándose que todo o que vén de fóra é o que vale, o innovador, etc.

6.- Que significa para vós poder formar parte do cartaz do concerto rock deste venres en Chantada?

En Chantada sempre se nos tratou moi ben e iso que din que ninguén é profeta na súa terra. Vimos de pasalo en grande en Pantón e en Castro Caldelas, no Ponte Louco, e con esa mesma ilusión e gañas de rebentar a festa chegamos esta sexta feria. Amais, co aliciente de presentar novo gaiteiro, Manolo (Xorxe deixounos de momento...), e tocar con bandas do calibre de Dantebrama (Madrid), Kambotes (Rodeiro) e A Banda de Andrelo (Vigo). Se o público acompaña, como até agora sempre nos acompañou, #vaisearmar. Esperemos que o alcalde e a corporación fique contento da inversión.... @LiviaodeMarrao sempre se acorda da xente de ben.

7.- Tendes máis concertos confirmados nos próximos meses?

Vivimos ao día... o 31 de agosto estaremos en Esmoriz, parroquia de Chantada e longo andamos argallando unha serie de concertos para o outono-inverno... será unha época moi especial para nós porque o noso batería vai ser papá... A nosa intención e facer varios concertos ao longo do inverno.

8.- Estades traballando en novos temas? Que proxectos tedes de cara o futuro?

Sempre procuramos facer temas novos e, se as circunstancias persoais o permiten, procurar innovar. Iso só se consegue con ensaio, ensaio e máis ensaio. O segundo disco, que ben podería chamarse Partido Porcino: Un canado de unto. irá facéndose ao seu ritmo. Xa temos novas músicas e aínda que seguirá contando cos ingredientes principais do Matança eta filhoak! contará tamén cun perfil festeiro máis marcado. Outros proxectos, que pouco a pouco irán collendo forma, está tamén en camiño, mais preferimos mantelos aínda na clandestinidade que é onde se curan ben os xamóns e se trasfega a boa augardente...

Despedímonos desde o noso bunkertoco na Serra do Faro, Matança eta filhoak!

#2014FerradosDeFesta começa o vindouro dia 30 na Sala Moon

Começamos bourando neste 2014 com o nosso tour #2014FerradosDeFesta que encetará a sua andaina em Compostela na Sala Moon, em companha dos nossos vizinhos e irmãos de Malas Herbas concerto para o qual fizemos a seguinte promoção, que podeis ver premendo aqui.

Continuaremos em Lugo, na Candelória celebrada no Clavicémbalo, o dia 7 de fevereiro e o dia 8 de fevereiro estaremos em Monforte de Lemos com a gente do Festival do Paradiso. Como sempre, iremos ampliando informação nas redes sociais.

#OutonoVermelho na Yoel

Liviao de Marrao quer agradecer a todas e todos os que vos achegastes o passado dia 28 e ateigastes a Discoteca Yoel como desde faz bem anos nom se via. Como sempre, com a vossa companha, passamo-lo como ananos. Já andamos argalhando novos temas e reactualizando a nossa posta em cena para que os que nos sigais mais e os que nos vejam por vez primeira podam seguir desbroçando festas na nossa companha. 

À espera de organizar novas datas, lembramos-vos que o 23 de novembro temos confirmada a seguinte cita com todas e todos vós em Manzaneda, no festival À Rebusca de Manzaneda. Neste mês de outubro andaremos em obras no nosso site http://liviaodemarrao.wix.com/portada polo que vos pedimos disculpas antecipadamente por qualquer problemas que poda surdir, sem ir mais longe estamos comprovando o bom funcionamento dalgumhas ligaçons como o programa da rádio alemá em que participou a nossa música e cujo linque nom funcionava. Novo linque premer aqui.

O nosso Matança eta filhoak! está, como bem sabeis, desde há um mês para descarregar de graça no nosso site. Onze temas que aguardemos sejam do vosso agrado e, se vos presta, podeis ajudar-nos a produzir mais cd's mercando a sua cópia física nos seguintes pontos de venda:

CHANTADA: Meigo e Besto Bravo S.L. A Lagoa de Vila Uge.

CARVALHEDO: Lusco-fusco (A Barrela), Supermercado Tandi (Augada) e Mancho (Castro).

MONFORTE DE LEMOS: Lechu e Molinón

FERROL: Artábria

CRUNHA: Bodegas Prado

COMPOSTELA: Gentalha do Pichel, Avante, BarTolo 

VIGO: Frenopátiko, Marinheiro

RODEIRO: Quirós e Bruxas

No restastes lugares (o local social da Rebusca em Manzaneda ou Bar da Feira de Pantom por exemplo) nestes momentos estám esgotados. Estamos reorganizando também os pontos de venda porque cada vez ficam-nos menos cópias. Disculpai igualmente as moléstias que isso poda ocasionar.

Viana Manifest (1994-2014): 20 anos de Bravú

Artigo redigido por Liviao de Marrao para o jornal local A Voz do Agro (http://avozdoagro.com/).

Uma noite no moinho

uma noite não é nada

uma semaninha inteira

essa sim que é moinhada 

Cartaz da XI edição do Castanhaço-rock, recuperado desde o ano 2007 pela associação cultural "O Castanhaço".

Aproveitamos o espaço que nos cede A Voz do Agro para lançar este artigo em que rememoramos a iminência da chegada duma das efemérides fundamentais para a música galega que tem a Chantada no seu epicentro. Como alguns lembrareis por vivência própria e outros sabereis através da transmissão oral e escrita, referimo-nos ao Manifesto de Viana, assinado em 1994 na tasca do Cavalhero no lugar de Viana, e o manifesto mais importante no sistema musical galego moderno. É o nosso Viana's Manifest em referência a aquela música de Muguruza que falava do Karl's Manifest.

Uma pantasma percorre a Galiza, a pantasma do bravú. E, por isso, desde o coletivo Liviao de Marrao fazemos um chamamento a todas aquelas pessoas ligadas com o sistema musical galego e com a cultura da nossa nação para que o 2014 seja um ano centrado na memória do bravú e do Manifesto de Viana, que remate na elaboração dum novo manifesto e numa festa memorável na vindoura edição do festival Catanhaço-rock de Chantada.

Ao tempo, repassaremos a história daquele momento fundacional do bravú para os nossos leitores mais novos. Em primeiro lugar, a etiqueta bravú (em Chantada dizemos bravio) refere-se à carne sem castrar, ao autêntico, ou seja, no eido musical à música feita na Galiza, no rural, em galego e com uma visão nacional, rebelde e contestatária.

O 31 de outubro de 1994 nascia o movimento bravú na já citada taberna da paróquia de Viana, hoje reconvertida em indústria cárnica que oferece, no entanto, ainda alguma comida ocasional.. Fazia-o no marco duma edição da primeira época do Castanhaço-rock e subscrevem aquele manifesto bandas hoje míticas: Rastreros de Chantada, que voltaram à atividade e estão elaborando um novo disco; Skornabois de Lourençá; Impresentábeis de Vimianço; Caimán do Río Tea, também novamente em ativo, de Ponte Areias; Bochechiñas; Verghalludos; Yellow Pixoliñas, cuja homenagem o passado ano deu pé a um novo festival em Monforte, o Naúfragos; os Papaqueixos e os Diplomáticos de Montealto da Crunha.

Um feixe de grupo que através de iniciativas como o Castanhaço (que nasceu em 1993 e do que nesta edição se fazem 20 anos da sua primeira edição) se foram conhecendo na era em que não havia Internet. Cada banda tinha as suas influências que lhe deram ao movimento certos elementos comuns (a língua galega, o espírito contestatário...), mas onde cada grupo era um mundo. 

Talvez esse fosse o seu maior mérito. Integrar num movimento a música mais urbana com elementos da música tradicional através do filtro das guitarras elétricas e as letras que falavam do aqui e do agora, letras cheias de retranca e força. The Clash, Kortatu, a munheira, Pucho Boedo, Los Satélites, Fuxan os Ventos, The Pogues, o Cuco de Velhe, o rock radical basco ou La Polla Records também estavam sob a tinta daquele manifesto. 

Daquela juntança deram fé Manuel Rivas e Alberte Casal. Ainda que à literatura quem melhor o transportou foi Santiago Jaureguizar ou Xosé Manuel Pereiro, editor em Xerais da revista Bravú. Precisamente, Pereiro era a voz dum dos precursores do movimento, a banda Radio Oceano.

De Viana saiu o primeiro manifesto bravú... mas de onde vinha aquele termo? Segundo parece o termo atribui-se aos Diplomáticos e mais em concreto a Xurxo Souto. A banda de Montealto em 1991 apresentavam Arroutada Pangalaica e para 1993 aparece o termo bravú – que é como se diz bravio no galego ocidental- a consequência de que ao saírem a Euzkadi e Catalunya ouviram empregar a etiqueta agropop, com a que, folga dizer, para nada se identificavam.

Para Rómulo Sanjurjo o sucesso do manifesto deveu-se à falha de pretensões do manifesto, sem esquecermos a importância que teve a difusão de muitos temas no programa da TVG Xabarín Clube, que marcaram várias gerações de galegas e galegos.

Daquela experiência foram agromando bandas como Xenreira, Ruxe-Ruxe – talvez uma das bandas mais reconhecidas hoje dentro do género alternativo do sistema musical galego, e outras que antes (Zënzar) e depois, por exemplo Machina que se denominaram o seu trabalho como pós-bravú, seguiram e seguirão apostando pela música em galego. Nós dizemos retranqueiramente que fazemos pós-neo-bravú porque as etiquetas afinal são algo artificial e pouco ajustado à realidade, mas é indubitável que nunca existiriam bandas como a nossa sem aquele tremor de terra que teve o seu epicentro numa pequena aldeia de Chantada.  

Uma pantasma percorre a Galiza, a pantasma do rock sem capar, do bravú. Longa vida ao bravú e 1000 primaveras mais para a música em galego!

Vindouros concertos de Liviao de Marrao

Depois da nossa gira pela Ribeira Sacra, outros vam de gira a América do Sul xD, começamos outro ciclo este outono elaborando novos materiais sem por isso deixar de dar concertos. Assim, encetamos a nossa gira Outono Vermelho em Rodeiro, no pub Quirós, com os camaradas de Malas Herbas e mais com os Kambotes.

A seguinte cita será na discoteca Yoel de Chantada o 28 de setembro às 00:30 da noite. Justo um mês depois dos nossos concertos de verão na vila do Asma que, como sabeis, foram a sexta-feira das festas de Chantada e mais o 31 de agosto em Esmoriz. Para os que não pudestes ver-nos então ou ficastes com ganhas de mais, tendes agora a oportunidade de fazer uma grande festa e colapsar a discoteca Yoel por uma noite, com certeza leva décadas sem encher-se... vas faltar?

E, a continuação, toca-lhe o turno a um dos festivais que mais nos prestaram sempre da Galiza e que agora nos pilhará por cima dum cenário: sim, trata-se da Rebusca de Manzaneda, será o  23 de novembro. O cartaz já o diz tudo, não é? 

Desde alguma tobeira indeterminada na Serra do Faro, gora o ponteiro em Fa em gora Liviao de Marrao! Matança eta filhoak!

Já podes descarregar de graça o nosso "MATANÇA ETA FILHOAK!" desde o nosso site (e anunciamos a nossa nova gira!)

Todos os nossos temas, as suas letras e muito mais no nosso site que imos melhorando sempre que podemos. Aguardamos que vos preste e que o nosso Matança eta filhoak! se espalhe urbi et orbe. Lembrai igualmente que, se vos presta, vos podeis fazer com o original em formato físico por apenas 10€ nos distintos pontos de venda.

Descarrega Matança eta filhoak! (preme aqui).

Pontos de venda

Chantada - Meigo, Besto Bravo S.L. e Ribeiriña

Carvalhedo - Lusco-Fusco, Tandi e Mancho.

Tabuada - Mario

Rodeiro - Pub Quirós e Bruxas

Monte Rosso - Bruxelas

Monforte de Lemos - Molinón e Lechu

Manzaneda - A Rebusca

Compostela - BarTolo, Avante, A Gentalha do Pichel...

Ferrol - Artábria

Vigo - Marinheiro, Kaleidoskopio, Bou Eva...

Cambados - A Fonte do vinho

E por suposto também nos podeis fazer o vosso pedido através do nosso endereço electrónico ou das nossas redes sociais.

AGENDA LIVIAO DE MARRAO  #OutonoVermelho

13 de setembro em Rodeiro, concerto no pub Quirós com Malas Herbas e Kambotes

15 de setembro no Chantadinho, onde teremos cd's e camisolas à venda.

23 de novembro na Rebusca de Manzaneda (de momento o cartaz ainda nom é público)